4 oktyabr 2020-ci ildə Ermənistan silahlı qüvvələri çirkin əməllərə əl ataraq cəbhə bölgəsindən xeyli aralıda yerləşən Azərbaycanın ikinci böyük şəhəri Gəncəni ilk dəfə raket atəşinə tutub.
Shimal.News xəbər verir ki, həmin gün üç raket zərbəsi nəticəsində bir nəfər – Tunar Qoşqar oğlu Əliyev həlak olub, 32 nəfər müxtəlif bədən xəsarətləri alıb.
Bundan başqa, şəhərin Nəriman Nərimanov, Əziz Əliyev, Əli Nəzmi və digər küçələrində yerləşən evlər tamamilə dağılıb, nəqliyyat vasitələrinə ciddi ziyan dəyib.
Azərbaycan tərəfi məsuliyyəti Ermənistanın daşıdığını bildirsə də, qarşı tərəf bu ittihamı rədd etdi. Hücuma görə məsuliyyəti keçmiş qondarma Dağlıq Qarabağ respublikasının rəsmiləri öz üzərlərinə götürdülər. Onlar hədəfin insanlar yox, şəhərdə olan hərbi təyinatlı binalar və Gəncə Beynəlxalq Hava Limanı olduğunu bildirdilər. Lakin Gəncədə, ümumiyyətlə, hərbi təyinatlı binalar yox idi və bu gün də yoxdur.
Xatırladaq ki, hadisələrin üçüncü ildönümündə, 2023-cü ilin oktyabrın 4-ü Gəncənin raket atəşinə tutulması əmrini verən Qarabağdakı separatçıların keçmiş "prezidenti" Araik Arutyunyan Dövlət Təhlükəsizliyi Xidmətinin (DTX) əməkdaşları tərəfindən saxlanılıb.
