Bayram Səlimov 1929-cu ildə Qusar rayonunun Sudur kəndində anadan olub.
Səlimov Sudur kənd orta məktəbini bitirdikdən sonra, 1947-ci ildə Dərbənd Pedaqoji Məktəbində və hərbi məktəbdə təhsil alıb. O, 1951-ci ildə Ali Hərbi Desant Məktəbini bitirdikdən sonra sovet ordusunda zabit kimi xidmət edib.
Bayram Səlimov 1958-ci ildən Dağıstanda jurnalistika ilə məşğul olmuşdur. O, qəzet və jurnal redaksiyalarında, televiziyada şöbə müdiri, məsul katib, redaktor vəzifələrində çalışmışdır. Səlimov, eyni zamanda Dağıstan Dövlət Universitetinin filologiya fakültəsində təhsil alırdı.
Bayram Səlimovun şeirləri 1946-cı ildən dövri mətbuatda çap olunurdu. Səlimov ləzgi dilində 20-dən artıq şeirlər toplusu buraxmışdır. Onların arasında “Mübarizə yollarında”, “Qanadlar”, “Qızılgülün mahnıları”, “Bağışlayın, insanlar”, “Kəklik yuvası” və digərləri var.
Bayram Səlimovun Mahaçqalada, Bakıda, Moskvada, Alma-Atada 40 kitabı: “Mübarizə yollarında", “Qanadlar”, “Qızılgülün mahnıları", "Şahin yuvası”. “Qoca kitab”, “Bağışla, insan”, “Günəşi dəvət” , “Mahnı kəndə qayıtdı”, “Arı yolu", “Niyə Qafqazda aslan yoxdur?”, "Səhər sübhdən” , "Qartal zirvəsi", "Yuxusu yoxdur çinarın”, “ Biçilmiş cərgələr” , “Tanışlar” kimi kitabları çap olunmuşdur.
Şairin 10-dək şeir kitabı rus dilində çap olunmuşdur. Onun şeirləri Moskvanın “Literaturnaya Rossiya” qəzetində, “Krokodil” jurnalında müntəzəm çap olunurdu.
Bayram Səlimov Zabit Rizvanovla birlikdə ləzgi xalqının “Şarvili” eposunu toplayıb, kitab kimi çap etdirmişdir. O, 1964-cü ildən SSRİ-nin Yazıçılar İttifaqının üzvü olub.
Bayram Səllimova 1999-cu ildə “Dağıstanın Xalq şairi” fəxri adı verilib. O, Dağıstan Respublikasının Əməkdar mədəniyyət işçisi idi. Şair “Literaturnaya Rossiya” qəzetinin “Qızıl buzov” mükafatının laureatı olub.
Bayram Səlimov 20 may 2014-cü ildə vəfat edib.
İstinad edilən mənbələr:
