İntiqam Alı oğlu Mehdizadə 14 fevral 1945-ci ildə İsmayıllı şəhərində anadan olub.
O, həmin şəhərdə orta məktəbi bitirib, 1963-cü ildə Neft Daşlarında əmək fəaliyyətinə başlayıb. Mehdizadə 1964-1968-ci illərdə indiki BDU-nun jurnalistika fakültəsində təhsil alıb.
Mehdizadə 1970-1973-cü illərdə “Azərbaycan gəncləri” qəzetində ədəbi işçi vəzifəsində çalışdıqdan sonra Azərbaycan Teleradiosunda işləyib.
O, ədəbi yaradıcılığa 1960-cı illərdə başlamışdır. İlk şeiri “Jurnalist” qəzetində 1966-cı ildə dərc edilmişdir. Dövri mətbuatda povest və hekayələri işıq üzü görmüşdür. Onun “Təsəlli”, “Hərənin öz dünyası”, “Bulaq”, “Novruz töhfələri”, “Karvanın sarvanı” və digər əsərləri var.
Həmçinin 1970-ci illərdə “Bulaq” verlişinin redaktoru olmuşdur. 1973-cü ildə Azərbaycan SSR Dövlət Televiziya və Radio Verilişləri Komitəsində redaktor vəzifəsinə təyin olunub. Burada böyük redaktor, şöbə müdiri, baş redaktor vəzifələrinə qədər yüksəlib. “Gənclik və idman” redaksiyasına rəhbərlik edib. O, “Lahıc” televiziya filminin ssenari müəllifidir.
Mehdizadə 1988-ci ildən Azərbaycan Yazıçılar Birliyininin üzvü, Jurnalistlər Birliyinin üzvü idi. O, Respublika Mətbuat Fondunun “Dan Ulduzu”, Jurnalistlər Birliyinin “Həsən bəy Zərdabi” və “Qızıl qələm” mükafatlarına layiq görülüb.
İntiqam Mehdizadə 8 iyun 2022-ci ildə vəfat edib. O, İsmayıllı şəhər qəbiristanlığında dəfn olunub.
İstinad edilən mənbələr:
