Şahin Fazil oğlu Fərzəliyev 27 mart 1940-cı ildə Quba şəhərində anadan olub. O, Şahin Fazil adı ilə tanınır. Fərzəliyev şair, şərqşünas, tərcüməçi, Azərbaycan Yazıçılar Birliyinin üzvü, tarix üzrə elmlər doktorudur.
Şahin Fazil 1948-ci ildə orta məktəbdə oxumağa başlayıb. Daha sonra o, indiki BDU-nun Şərqşünaslıq fakültəsinin fars dili şöbəsinə daxil olub. 1964-cü ildə fərqlənmə diplomu ilə universiteti bitirib.
Fərzəliyev ədəbi fəaliyyətə 1950-ci illərdə başlamışdır. İlk şeiri “Qız Bənövşə” 1958-ci ildə “Qızıl Quba” qəzetində dərc olunmuşdur. O, 1997-ci ildən Yazıçılar İttifaqının üzvüdür.
Şahin Fazil 1963-1966-cı illərdə Əfqanıstanda tərcüməçi kimi çalışmağa göndərilən ilk tələbə idi. Daha sonra o, Əfqanistanda tərcüməçi kimi ikinci dəfə 1968-1970-ci illərdə, üçüncü dəfə 1978-1982-ci illərdə və dördüncü dəfə 1985-1988-ci illərdə fəaliyyət göstərmişdir.
Həmin zaman Şahin Fazil əfqan yazıçılarının şeirlərini tərcümə edib, Azərbaycana göndərmişdir. Həmçinin Azərbaycan yazıçılarının şeirlərini fars dilinə tərcümə edib, oraya göndərirdi. Şahin Fazil, eyni zamanda farsca şeirlər yazıb, oradakı jurnallarda çap etdirirdi. O, bir neçə Fəxri Fərmanla (SSRİ) və üç Əfqanistan ordenı ilə təltif olunmuşdur.
1966-1968-ci illərdə ADU-nun Şərqşünaslıq fakültəsində dekan müavini, 1983-1985-ci illərdə Elmlər Akademiyasının Tarix İnstitutunun baş elmi işçisi olmuşdur.
Fərzəliyev 1996-cı ildən Azərbaycan Elmlər Akademiyasının Tarix İnstitutunun baş elmi işçisi kimi fəaliyyət göstərir.
Tarixçi Moskva, Ankara, İstanbul, Daşkənd, Təbriz, Mahaçqala və digər şəhərlərdə keçirilmiş beynəlxalq elmi konfrans və görüşlərdə fəal iştirak etmişdir. O, həmçinin 2009-cu ildə Yaponiyanın Sinday Universitetinin dəvəti ilə Azərbaycan tarixşünaslığına dair mühazirə oxumuşdur.
Şahin Fərzəliyev 5 divan, 30-dan çox kitab, 300-dən artıq elmi məqalələrin müəllifidir. Onlardan “Azərbaycan XV-XVI əsrlərdə” (Həsən bəy Rumlunun “Əhsənüt-təvarix” əsəri üzrə), “Azərbaycan və Osmanlı imperiyası XV-XVI əsrlərdə”, “Quba tarixi”, “XV əsr Azərbaycan dövlətlərinin quruluşu”nu qeyd etmək olar.
İstinad edilən mənbələr:
