Quba–Xaçmaz avtomobil yolunun Zərdabi qəsəbəsi ərazisindən keçən hissəsində küçə işıqlandırması ilə bağlı problem uzun müddətdir həllini tapmır.
Shimal.News-a verilən məlumata görə, yolun təxminən 600-700 metrlik hissəsində yerləşən işıq dirəkləri ötən ilin sentyabr ayından etibarən fəaliyyət göstərmir.
Sakinlərin sözlərinə görə, günün qaranlıq saatlarında həmin ərazi tamamilə işıqsız qalır. Bu isə həm sürücülər, həm də piyadalar üçün əlavə risk yaradır. Xüsusilə yağışlı və dumanlı havalarda görünüş məsafəsinin azalması təhlükəni daha da artırır.
Ərazi sakinləri bildirirlər ki, problem aylarla davam etsə də, indiyədək işıqlandırma sisteminin bərpası istiqamətində hər hansı nəticə görünmür.
Onlar aidiyyəti qurumlardan Quba–Xaçmaz yolunun Zərdabi qəsəbəsindən keçən hissəsində yaranmış problemin aradan qaldırılmasını və küçə işıqlandırmasının bərpa olunmasını xahiş edirlər.
