Qusar rayonunun Yasab kənd sakini Elşad Rəşad oğlu Ağayev HIPPO Beynəlxalq İngilis Dili Olimpiadasının Milli Final mərhələsində uğur qazanaraq bürünc medala layiq görülüb.
Shimal.News xəbər verir ki, Elşad seçim mərhələsində maksimum 60 baldan 57 bal, Milli Finalda isə 55,5 bal toplayıb.
2017-ci ildə anadan olan Elşad kiçik yaşlarından müxtəlif bilik yarışlarında fərqlənib. O, 5 yaşından ingilis dilini müstəqil şəkildə öyrənməyə başlayıb və mental arifmetika üzrə biliklərə yiyələnib.
Gənc istedad daha əvvəl Kanadada keçirilən WAW Olimpiadasında iki qızıl medal, USE Beynəlxalq Olimpiadasında isə gümüş medal qazanıb.
Cəmi 8 yaşı olmasına baxmayaraq, Elşadın əsas hədəfi beynəlxalq yarışlarda daha böyük uğurlar əldə edərək Azərbaycanı dünya səviyyəsində təmsil etməkdir.
