Qusar Rayon İcra Hakimiyyətinin başçısı Sahir Məmmədxanovun Langi kəndində səyyar vətəndaş qəbulu keçirilib.
Shimal.News xəbər verir ki, tədbirdə rayonun hüquq-mühafizə orqanlarının rəhbərləri, aidiyyəti idarə və müəssisələrin nümayəndələri, xidmət sahələrinin rəhbərləri və kənd sakinləri iştirak ediblər.
Görüşdə sakinlər kənddaxili yolların təmiri, içməli su təchizatının yaxşılaşdırılması üçün artezian quyusunun qazılması, suvarma suyu ilə təminatın gücləndirilməsi, kəndin qazlaşdırılması, eləcə də tibb məntəqəsinin yaradılması ilə bağlı müraciətlər səsləndiriblər. Vətəndaşların müraciətləri dinlənilib, qaldırılan məsələlərin həlli üçün aidiyyəti qurumlara müvafiq tapşırıqlar verilib.
Görüşdə kənd üzrə əmlak və torpaq vergilərinin ödənilməsi məsələsi də müzakirə olunub. Məlum olub ki, bəzi sakinlər BAMS-da (Bələdiyyələrin Avtomatlaşdırılmış Məlumat Sistemi) qeydiyyatda olmadıqları üçün vergi öhdəliklərini yerinə yetirməkdə çətinlik çəkirlər.
Bununla əlaqədar Sahir Məmmədxanov aidiyyəti qurumlara sakinlərin BAMS-da qeydiyyata alınması və vergi öhdəliklərinin icrasına cəlb olunması üçün təxirəsalınmaz tədbirlərin görülməsini tapşırıb.
