Bu gün Azərbaycan ədəbiyyatının ən parlaq simalarından biri, nakam taleyi ilə yadda qalan böyük şair Mikayıl Müşfiqin doğum günüdür.
Shimal.News xatırlardır ki, 1908-ci il iyunun 5-də Bakının qədim Dağlı məhəlləsində dünyaya gələn Mikayıl Müşfiqin həyatı uşaqlıqdan ağır sınaqlarla başlayıb. O, çox kiçik yaşlarında anasını, altı yaşında isə atasını itirib. Yetim qalan balaca Mikayıl yaxınlarının himayəsində böyüyüb.
Şair sonralar uşaqlıq illərini belə xatırlayırdı:
"Ac, yalavac, çılpaq bir uşaqlıq keçirdim".
Bütün çətinliklərə baxmayaraq, elmə və ədəbiyyata olan sevgisi onu Azərbaycan poeziyasının zirvəsinə yüksəltdi. Təhsilini başa vurduqdan sonra müəllim kimi fəaliyyət göstərən Müşfiq eyni zamanda şeirləri ilə oxucuların diqqətini çəkməyə başladı.
1926-cı ildə "Bu gün" şeiri ilə ədəbiyyata qədəm qoyan gənc şair qısa müddətdə dövrünün ən sevilən qələm sahiblərindən birinə çevrildi. Onun "Küləklər", "Günün səsləri", "Pambıq", "Şeirlər", "Qaya" və digər kitabları Azərbaycan poeziyasına yeni nəfəs gətirdi.
Mikayıl Müşfiqin yaradıcılığında həyat eşqi, azadlıq duyğusu, insan sevgisi və gələcəyə inam xüsusi yer tuturdu. Elə buna görə də onun şeirləri aradan onilliklər keçsə də, bu gün də sevilərək oxunur.
Lakin şairin taleyi yaradıcılığı qədər işıqlı olmadı.
1937-ci ilin repressiyaları zamanı minlərlə ziyalı kimi o da sovet totalitar maşınının qurbanına çevrildi. Həbs olunan şair 1938-ci il yanvarın 6-da, cəmi 29 yaşında güllələndi.
Mikayıl Müşfiq həyatdan çox erkən getsə də, Azərbaycan ədəbiyyatına silinməz iz qoydu. Onun qələmə aldığı misralar bu gün də dillər əzbəridir, adı isə Azərbaycan poeziyasının ən böyük simvollarından biri kimi yaşayır.
