Quba rayonunun Tülər–Yenikənd–Möhüc kəndlərinə gedən avtomobil yolunda yaranmış təhlükəli vəziyyət yerli əhalini ciddi narahat etməyə davam edir.
Shimal.News-a müraciət edən sakinlərin sözlərinə görə, aylar əvvəl gündəmə gətirilən problem hələ də həll olunmayıb. Əksinə, son həftələrdə torpaq sürüşməsi daha da genişlənib, yolun müxtəlif hissələrində yeni çatlar və uçqun təhlükəsi yaranıb.
Şikayətçilər bildirirlər ki, vəziyyət artıq kritik həddə çatıb:
"Problem həllini tapmır. Günbəgün yolun müxtəlif hissələrində vəziyyət daha da pisləşir. Gərək kimsə orada həlak olsun ki, aidiyyəti qurumlar hərəkətə keçsin?"
Onların sözlərinə görə, yolun meşəlik əraziyə yaxın hissələrində torpaq qatının sürüşməsi davam edir. Təhlükəli sahələrdə yalnız iri daşlar düzülərək sürücülərə xəbərdarlıq edilməyə çalışılır. Lakin bu tədbirin təhlükəni aradan qaldırmadığı vurğulanır.
Xüsusilə kəndlərə sərnişin daşıyan avtobusların həmin yoldan istifadə etməsi sakinlərin narahatlığını daha da artırır.
"Yolu tanımayan sürücü istənilən an qəzaya düşə bilər. Buradan keçən avtobuslardan biri aşsa, faciənin qarşısını almaq mümkün olmayacaq."
Sakinlər qeyd edirlər ki, problem artıq iki aydan çoxdur davam edir və hər keçən gün yolun vəziyyəti daha da ağırlaşır. Onlar aidiyyəti qurumları gec olmadan ərazidə təxirəsalınmaz tədbirlər görməyə çağırırlar.
