Uzun illər Ali Məhkəmənin hakimi olmuş, Əməkdar hüquqşünas Əsəd Mirzəliyev fəaliyyət dövründə baxdığı ən ağır işlərdən birinin Qusar rayonu ilə bağlı olduğunu açıqlayıb.
Onun sözlərinə görə, hadisə Qusarda gənc ailədə baş verib. Yeni dünyaya gəlmiş, 10 günlük körpənin valideynləri arasında ciddi mübahisə yaranıb. Mübahisədən sonra ana evi tərk edərək körpəni atanın yanında qoyub.
Hakimin sözlərinə görə, hadisələrin sonrakı inkişafı daha dramatik olub. Körpəyə təkbaşına baxmaqda çətinlik çəkən ata məhkəməyə müraciət edib və nəticədə uşaq övladlığa verilib.
Aradan illər keçdikdən sonra ana övladının taleyi ilə maraqlanmağa başlayıb. Həmin vaxt uşağın artıq 5 yaşı var imiş. Ana məhkəməyə müraciət edərək övladının ona qaytarılmasını tələb edib.
Əsəd Mirzəliyev bildirib ki, məhkəmə prosesi son dərəcə ağır emosional atmosferdə keçib. Bir tərəfdə bioloji ana, digər tərəfdə isə uşağı beş il böyüdən ailə dayanırdı.
Hakimin sözlərinə görə, uşağı övladlığa götürən ata məhkəmədə çıxış edərək körpənin onlardan alınacağı halda buna tab gətirə bilməyəcəyini bildirib.
Məhkəmə bütün tərəflərin mövqeyini, qəyyumluq orqanının rəyini və uşağın maraqlarını araşdırdıqdan sonra qərar qəbul edib. Nəticədə uşağın bioloji anaya verilməsi ilə bağlı tələb təmin olunmayıb.
Əsəd Mirzəliyev qeyd edib ki, qərarın əsasını uşağın mənafeyi təşkil edib:
"Bütün belə mübahisələrdə əsas məsələ uşağın maraqlarıdır. Beş il həmin ailədə böyüyən uşağın birdən-birə başqa mühitə verilməsi onun psixologiyasına ağır təsir göstərə bilərdi".
Keçmiş hakimin sözlərinə görə, bu iş illər keçsə də, yaddaşında ən çətin və təsirli məhkəmə proseslərindən biri kimi qalıb. O, uşaqların taleyi ilə bağlı qərarların hüquqi çərçivə ilə yanaşı, böyük mənəvi məsuliyyət daşıdığını vurğulayıb.
