Şəkidə doğulan və hazırda Qazaxıstanda təhsil alan azərbaycanlı tələbə Aysun Tanrıverdiyeva gələcəyini diplomatiya sahəsində görür.
AZƏRTAC-ın məlumatına görə, Aysun Y.A.Buketov adına Karaqanda Milli Tədqiqat Universitetində beynəlxalq münasibətlər ixtisası üzrə təhsil alır, beynəlxalq layihələrdə iştirak edir və müxtəlif ölkələrin diplomatları ilə görüşlər keçirir.
Aysun Tanrıverdiyeva bildirib ki, uşaqlıq illəri Şəki rayonunun Təpəcənnət kəndində keçib. Onun sözlərinə görə, sonradan ailə vəziyyəti ilə əlaqədar Qazaxıstanda təhsilini davam etdirməsi dünyagörüşünün formalaşmasında mühüm rol oynayıb.
"Başqa ölkədə yaşamaq mənə müxtəlif mədəniyyətləri daha yaxından tanımağa və insanlarla ortaq dil tapmağın vacibliyini anlamağa kömək etdi. Beynəlxalq münasibətlərə marağım da məhz həmin dövrdə formalaşdı", – deyə o qeyd edib.
Gənc tələbə diplomatiyaya marağının uşaqlıqdan yarandığını bildirib. O, ailəsinin və xüsusilə Azərbaycan Ordusunun zabiti olmuş atası Azər Tanrıverdiyevin həyat yolunun onun vətənpərvərlik ruhunda böyüməsinə təsir etdiyini vurğulayıb.
Aysun Tanrıverdiyeva hazırda Azərbaycan, türk, rus, qazax və ingilis dillərində sərbəst danışır, eyni zamanda fransız dilini öyrənir. O hesab edir ki, xarici dilləri bilmək müxtəlif ölkələrdən olan insanlarla ünsiyyət qurmaq və beynəlxalq layihələrdə fəal iştirak etmək üçün böyük üstünlük yaradır.
Onun fikrincə, Azərbaycan və Qazaxıstan gəncləri iki ölkə arasında mədəni və humanitar əlaqələrin möhkəmləndirilməsində mühüm rol oynayırlar. Təhsil proqramları, qrant layihələri və beynəlxalq mübadilə imkanları bu prosesə ciddi töhfə verir.
Gənc azərbaycanlı beynəlxalq tədbirlərdə və diplomatlarla keçirilən görüşlərdə də iştirak edib. O, Litvanın Azərbaycandakı keçmiş səfiri, hazırda isə Qazaxıstandakı diplomatik missiyanın rəhbəri Egidiyus Navikasla görüşünü, eləcə də Astanada Azərbaycanın Müstəqillik Günü və Silahlı Qüvvələr Gününə həsr olunmuş tədbirdə iştirakını ən yaddaqalan təcrübələrindən biri kimi qiymətləndirib.
Aysun Tanrıverdiyeva gələcəkdə beynəlxalq münasibətlər və beynəlxalq iqtisadi əlaqələr sahəsində fəaliyyət göstərərək Azərbaycanın maraqlarını beynəlxalq arenada təmsil etmək istədiyini bildirib.
"Əsas məqsədim ölkələr arasında əlaqələrin möhkəmlənməsinə real töhfə vermək, Azərbaycanın maraqlarını layiqincə təmsil etmək və beynəlxalq əməkdaşlığa praktik fayda gətirməkdir", – deyə o vurğulayıb.
