Qəbələ rayonunun Aşağı Həmzəli kəndində tanınmış ziyalı, uzun illər pedaqoji fəaliyyət göstərmiş Azərbaycan dili və ədəbiyyatı müəllimi Qasım Əliyev vəfat edib.
Shimal.News xəbər verir ki, mərhum rayonun təhsil ictimaiyyəti arasında hörmət qazanmış müəllimlərdən biri olub. O, onilliklər ərzində yüzlərlə şagirdin yetişməsində, onların elmə və ədəbiyyata marağının formalaşmasında mühüm rol oynayıb.
Qasım Əliyev təkcə müəllim kimi deyil, həm də el-obada mədəni tədbirlərin fəal iştirakçısı kimi tanınıb. O, müxtəlif toy və el şənliklərində musiqiçi kimi çıxış edərək kəndin ictimai-mədəni həyatında özünəməxsus yer tutub.
Kənd sakinlərinin sözlərinə görə, Qasım müəllim sadəliyi, insanpərvərliyi və ziyalı mövqeyi ilə seçilən şəxslərdən olub. Onun vəfat xəbəri ailə üzvləri, yaxınları və keçmiş şagirdləri tərəfindən dərin kədərlə qarşılanıb.
Qeyd edək ki, mərhum Azərbaycanın Milli Qəhrəmanı, Şükür Həmidovun qayınatası idi. Vətən müharibəsində qəhrəmancasına şəhid olan polkovnik Şükür Həmidovun ailəsinə üz verən bu itki bölgədə böyük üzüntü ilə qarşılanıb.
