Qusar rayonunun Suvacal kənd sakinləri ictimai nəqliyyat problemi ilə üzləşdiklərini bildirirlər.
Shimal.News-a müraciət edən sakinlərin sözlərinə görə, uzun illər fəaliyyət göstərən Suvacal–Qusar avtobus marşrutu son aylarda dayandırılıb. Daha sonra kəndə xidmət göstərməsi üçün Əniq–Suvacal–Qusar marşrutu təşkil edilsə də, bu marşrut da problemin həllinə kömək etməyib.
Sakinlər bildirirlər ki, avtobus Əniq kəndindən sərnişinlərlə dolu şəkildə hərəkət etdiyi üçün Suvacal sakinlərinin əksəriyyəti marşrutdan istifadə edə bilməyib.
"Avtobus Suvacala çatanda artıq boş yer qalmırdı. Sakinlər oturmağa yer tapa bilmədikləri üçün həmin marşrutdan istifadə etmirdilər. Bir müddət sonra isə bu marşrut da ləğv olundu. Nəticədə kənd tamamilə marşrutsuz qaldı", – deyə sakinlər bildiriblər.
Onların sözlərinə görə, məsələ ilə bağlı dəfələrlə aidiyyəti qurumlara müraciət olunsa da, problem hələ də həllini tapmayıb.
Suvacal sakinləri qeyd edirlər ki, marşrutun olmaması xüsusilə yaşlılar, tələbələr, məktəblilər və rayon mərkəzinə gündəlik gedib-gələn vətəndaşlar üçün ciddi çətinlik yaradır.
Sakinlər aidiyyəti qurumlardan problemin araşdırılmasını və Suvacal–Qusar avtobus marşrutunun bərpa edilməsini xahiş edirlər. Onların fikrincə, kəndin ictimai nəqliyyatsız qalması əhalinin gündəlik həyatına mənfi təsir göstərir.
