İkram Həbib oğlu Novruzbəyov 22 sentyabr 1929-cu ildə Qusar rayonunun İmamqulukənd kəndində anadan olub.
O, kənd məktəbini və Quba Müəllimlər İnstitutunu bitirəndən sonra Ukraynanın Ujqorod Milli Universitetinə daxil olmuş, təhsilini Azərbaycan Dövlət Pedaqoji İnstitutunda tamamlamışdır.
Novruzbəyovun ali məktəblərdə elmi-pedaqoji fəaliyyəti 1963-cü ildən Azərbaycan Dövlət Universitetinin Hesablama Mərkəzində başlayıb. 1967-ci ildən alim baş elmi işçi kimi çalışmağa başlayıb. 1970-ci ildə Novruzbəyov İndiki BDU-nun Hesablama Mərkəzində direktorun elmi işləri üzrə müavin təyin edilib. 1973-1990-cı illərdə isə orada direktor kimi çalışıb. İkram Novruzbəyov 1980-ci ildə indiki Azərbaycan Texniki İnstitutunun tətbiqi riyaziyyat kafedrasına müəllim təyin olunub.
Alimə 1995-ci ildə UNESCO-nun Beynəlxalq Kadrlar Akademiyası tərəfindən fizika-riyaziyyat elmləri səviyyəsində fəlsəfə elmləri doktoru dərəcəsi verilmişdir. O, 1997-ci ildə Nyu-York Akademiyasının həqiqi üzvü seçilmişdir. Daha sonra İkram Novruzbəyov ömrünün sonuna kimi Azərbaycan Dövlət Texniki Universitetinin ali riyaziyyat kafedrasının professoru vəzifəsində çalışmışdır.
SSRİ dağılandan sonra onun elmi-pedaqoji fəaliyyəti Rusiya Federasiyasının “Cənubi Dağıstan” Universiteti ilə bağlıdır. 1994-2000-ci illərdə professor Novruzbəyov bu universitetin riyaziyyat kafedrasının müdiri, aspiranturanın rəhbəri, eyni zamanda Bakı Filialının prorektoru vəzifələrində çalışıb.
İkram Novruzbəyovun kosmonavtika ilə bağlı elmi nailiyyətləri “Soyuz-Apollon'’ kosmik gəmisində tətbiq olunmuşdur.
Professor 100-dən artıq elmi əsərin müəllifidir. Həmin elmi işlərin bəziləri ABŞ-də, Almaniyada, SSRİ-nin elmi jurnallarında dərc olunub. Mexanizmlərin optimal sintezi məsələri ilə bağlı tədqiqat işlərindən bir neçəsi ABŞ-də Nyu-York Akademiyasının akademiki H. Sandorla birlikdə dərc olunub.
İkram Novruzbəyov 2007-ci ildə vəfat edib.
İstinad edilən mənbələr:
