Şövkət Şahbaz qızı Səlimova 25 dekabr 1920-ci ildə İsmayıllı rayonunun Lahıc qəsəbəsində (digər mənbələrə görə Bakıda) neftçi ailəsində anadan olub. O, İkinci Dünya müharibəsi zamanı Azərbaycanın ilk qadın kapitanlarından biri olub. Buna görə o, “dənizlərin qızı” kimi də tanınıb.
Səlimova uşaq yaşlarında aviamodel kurslarına yazılır. 11 yaşında onun hazırladığı aviamodel rekord qıraraq birinci olur. Lakin o, SSRİ-nin ilk qadın dəniz kapitanı Anna Şetinanın fotosunu görür və ailəsinin narazılığına baxmayaraq, dənizçi olmağa qərar verir.
Səlimova 1934-cü ildə ümumittifaq yarışının qalibi olmuşdur. O, 1940-cı ildə Bakı Dənizçilik Məktəbini bitirmişdir. Daha sonra “Serqo” tankerində işləmişdir. İkinci Dünya müharibəsi illərində Xəzər gəmiçiliyi idarəsində gəmi kapitanı müavini və gəmi kapitanı kimi çalışmışdır.
Həmin zaman Şövkət Səlimova Xəzər dənizi vasitəsilə cəbhəni hərbi ləvazimat və yanacaqla təmin etmiş, həmçinin “Dnepr” paroxodu ilə döyüşlərə qatılmış və Stalinqrada hərbi texnika, yanacaq və döyüş sursatları daşımışdır. O, yaralıları Bakı və Krasnovodska çatdırırdı. Müharibədən sonra Səlimova Aralıq, Mərmərə, Egey, Qara dəniz limanlarına gedib çıxmışdır.
Səlimova 1950-ci ildə indiki Azərbaycan Dövlət İqtisad Universitetini və Bakı Ali Partiya Məktəbini (Azərbaycan Kommunist Partiyası Mərkəzi Komitəsi yanında fəaliyyət göstərən ali məktəb) bitirmişdir.
Səlimova 1954-1974-cü illərdə indiki Azərbaycan Dövlət Neft və Sənaye Universitetində dosent, prorektor və kafedra müdiri, 1964-cü ildən indiki Üzeyir Hacıbəyli adına Bakı Musiqi Akademiyasında kafedra müdiri olub, 1971-ci ildən isə Azərbaycan SSR-nin Əməkdar iqtisadçısı adına layiq görülüb.
Şövkət Səlimova “Qırmızı Ulduz”, “Qafqazın müdafiəsinə görə”, “Almaniya üzərində qələbəyə görə” mükafatları və 2-ci dərəcəli “Vətən müharibəsi” ordenləri ilə təltif edilmişdir.
Şövkət Səlimova 2 iyul 1999-cu ildə vəfat edib.
İstinad edilən mənbələr:
