9 May 1945-ci il tarixində SSRİ alman faşizmi üzərində qələbə qazanıb.
22 iyun 1941-ci ildə faşist Almaniyası Sovet İttifaqına hücum etdi. Böyük Vətən müharibəsi zamanı (1941-1945-ci illər) 600 mindən çox azərbaycanlı döyüşlərdə iştirak edib, onlardan 300 minə yaxın insan həlak olub.
Qusar rayonundan 10.125 nəfər səfərbər olmuş, onlardan 3.905-i geri qayıtmamışdır. Xaçmazdan 8.930 nəfər səfərbər edilmişdir, onlardan 2.496 nəfər həlak olmuş, 360 nəfəri isə itkin düşmüşdür. Qubadan 15.214 nəfər müharibəyə yola salınmışdır, onlardan 5.579 nəfəri həlak olmuş və ya itkin düşmüşdür.
1941-ci ilin oktyabr ayında 223-cü atıcı diviziya Quba-Qusar-Dəvəçi (indiki Şabran) zonasında yaradılmışdır. Diviziyanın döyüş yolu Şimali Qafqazdan başlayaraq, Avstriyanın paytaxtı Vyanaya qədər uzanmışdır. Yuqoslaviyanın paytaxtı Belqradın azad edilməsindəki qəhrəmanlığına görə bu hərbi birləşməyə “Belqrad diviziyası” adı verilmişdir.
