Bu gün 9 May - faşizm üzərində Qələbə Günüdür. 22 iyun 1941-ci ildə faşist Almaniyası Sovet İttifaqına hücum etdi. 9 may 1945-ci ildə isə SSRİ alman faşizmi üzərində qələbə qazanıb.
Böyük Vətən müharibəsi zamanı (1941-1945-ci illər) faşist Almaniyasına qarşı mübarizədə 600 mindən çox azərbaycanlı iştirak edib, onlardan 300 minə yaxın insan həlak olub. Qusar rayonundan 10.125 nəfər səfərbər olmuş, onlardan 3905-i geri qayıtmamışdır. Müharibəyə Xaçmazdan 8930 nəfər səfərbər edilmişdir. Onlardan 2496 nəfər həlak olmuş, 360 nəfəri isə itkin düşmüşdür. Qubadan 15.214 nəfər müharibəyə yola salınmışdır, onlardan 5579 nəfər həlak olmuş və ya itkin düşmüşdür.
1941-ci ilin oktyabr ayında 223-cü atıcı diviziya yaradılmış və Quba-Qusar-Dəvəçi (indiki Şabran) zonasında yerləşdirilmişdir. Diviziyanın döyüş yolu Şimali Qafqazdan başlayaraq Avstriyanın paytaxtı Vyanaya qədər uzanmışdır. Yuqoslaviyanın paytaxtı Belqradın azad edilməsindəki qəhrəmanlığına görə bu hərbi birləşməyə “Belqrad diviziyası” adı verilmişdir.
