Yanvarın 20-də ölkəmizin bütün bölgələrində olduğu kimi, şimal rayonlarında da 20 Yanvar şəhidlərinin xatirəsi anılır.
1990-cı il yanvarın 19-dan 20-nə keçən gecə Sovet İttifaqı Kommunist Partiyası Mərkəzi Komitəsinin baş katibi Mixail Qorbaçovun birbaşa əmri ilə sovet ordusu Bakıya və Azərbaycanın bir neçə rayonuna yeridilib, dinc əhali ağır texnikadan və müxtəlif tipli silahlardan atəşə tutularaq qətlə yetirilib.
Müdafiə naziri, marşal Yazovun rəhbərlik etdiyi 20 min nəfərlik ordu hissələri Bakı şəhərinə daxil olub. “Zərbə” kod adı verilən hərbi müdaxilə nəticəsində 131 nəfər öldürülüb, 744 nəfər yaralanıb, 841 nəfər qanunsuz olaraq həbs edilib, yüzlərlə insan isə itkin düşüb. Həmin faciənin şəhidləri 1990-cı il yanvarın 22-də Bakıdakı Dağüstü Parkda dəfn olunublar. Burada Şəhidlər xiyabanı salınıb.
Faciədən dərhal sonra - 1990-cı il yanvarın 21-də Ümummilli Lider Heydər Əliyev ailə üzvləri ilə birlikdə Azərbaycanın Moskvadakı daimi nümayəndəliyinə gələrək doğma xalqı ilə həmrəy olduğunu nümayiş etdirib, SSRİ rəhbərliyinin törətdiyi bu qanlı əməliyyata kəskin etirazını bildirib və həmin əməliyyata rəhbərlik edənləri ifşa edib.
1994-cü il martın 29-da Ümummilli Lider Heydər Əliyevin təşəbbüsü ilə 20 Yanvar faciəsinə ali qanunvericilik orqanı – Milli Məclis səviyyəsində ilk dəfə hüquqi-siyasi qiymət verilib. O vaxtdan 20 yanvar Azərbaycanda hər il Ümumxalq Hüzn günü kimi qeyd olunur.
20 Yanvar hadisələri zamanı Quba rayonundan olan 4 nəfər şəhid, 3 nəfər isə ağır dərəcəli bədən xəsarətləri alaraq əlil olub.
Allah şəhidlərimizə rəhmət eləsin!
[video width="720" height="720" mp4="https://shimal.news/storage/photos/2025/01/final-01182.mp4"][/video]
