Qafqazın yeganə velosiped zavodu İsmayıllı rayonunun mərkəzindən 6 kilometrlik məsafədə, Diyallı kəndində yerləşir. ShimalNews "İsma Bikes” haqda maraqlı məlumatları oxucuları üçün təqdim edir.
Müəssisə açılan zaman 3 əsas modeldə velosiped istehsal etsə də, mühəndis-konstruksiya işləri genişləndirilərək modellərin sayı 50-yə çatdırılıb. Həvəskar və peşəkar idmançılar, böyüklər və balacalar üçün müxtəlif tipli idman aləti ərsəyə gətirilir.
Böyüklər üçün təqdim edilən çeşidlər arasında “Sport” modeli sürət ötürücüsü, əyləc və digər sistemlərinin daha təkmil olması ilə fərqlənir. “Monster” modeli isə sadə əyləc və iki amortizatorla təmin olunub. «Hibrid 8.5» velosipedini həm asfalt, həm də kənd yolu, qum və dağ-daşda sürmək olar. “Ceyran”, “Qartal”, “Buta” kimi modellərlə yanaşı, “Mustang”, “Tayfun”, “Bizon”, “Lazer” adlı velosipedlər də alıcılar arasında rəğbət qazanıb.
“İsma” brendi uşaqlar üçün 20 sm diametrli təkərləri olan “Yaquar” (daha təkmil disk, əyləc və amortizator) və “Qartal”, 24-lük və 26-lıq “Akkord”, “Çinar 6.3” və “Çinar 6.5” (amortizatorunun blok olunması funksiyasına malikdir, əyləc isə hidravlika ilə işləyir), velosipedlərini də təqdim edir.
Şirkət, həmçinin qatlanan velosipedlər də istehsal edir. Nəqliyyat vasitəsinin bütün detalları, hətta pedalları da qatlana bilir. Bu isə öz növbəsində velosipedi iri çantada belə daşımağa imkan verir.
“Made in Azerbaijan” brendi ilə istehsal olunan hər velosipedə 1 illik zəmanət verilir, qiymətləri isə 98 manatdan 3656 manatadək dəyişir.
2200 kvadratmetr ərazisi olan zavod 2016-cı ilin avqust ayının 10-da fəaliyyətə başlayıb. Müəssisənin açılış mərasimində İlham Əliyev iştirak etmişdir. O, müəssisəni işə salmış və burada istehsal edilən velosipedi sınaqdan keçirmişdir.
[video width="1920" height="1080" mp4="https://shimal.news/storage/photos/2023/10/Sequence-03.mp4"][/video]
