Lahıc qəsəbə orta məktəbi İsmayıllı rayonunun Lahıc qəsəbəsində yerləşir. Məktəb 1888-ci ildə yeddiillik rus-tatar məktəbi kimi fəaliyyətə başlamışdır.
Məktəbin ilk öncə üç ibtidai sinfi olmuşdur. Daha sonra isə təhsil ocağı tam orta məktəb statusunu almışdır. Məktəbin üstünlüyü o idi ki, burada ana dilinin tədrisi məcburi idi. Həmçinin məktəbdə yaşlılar üçün savad kursları təşkil edilmişdir.
1920-ci ildə məktəb “Lahıc birinci dərəcəli müttəhid məsəi məktəbi” (Lahıc birinci dərəcəli birgə əmək məktəbi) adlanırdı. Qəsəbədə tam orta məktəb üçün yeni binanın tikintisinə 1927-1928-ci illərdə başlanıldı. 1930-cu ildə istifadəyə verilən həmin bina 130 şagird üçün nəzərdə tutulmuşdu.
1930-1937-ci illərdə təhsil ocağı yeddiillik məktəbə çevrilir və “Lahıc natamam orta məktəbi” kimi fəaliyyət göstərməyə başlayır. 1937-ci ildən isə təhsil müəssisəsi “Lahıc qəsəbə orta məktəbi” adını daşımağa başlayır.
Məktəb bir neçə dəfə rayon üzrə “İlin ən yaxşı tədris müəssisəsi” müsabiqəsinin qalibi olmuşdur. Həmçinin məktəb ABŞ, Fransa, İsrail, Norveç səfirlikləri, xarici təşkilatlarla əlaqə saxlayır. 2005-2007-ci illərdə Dünya Bankının “Məktəb Qrant Proqramı” çərçivəsində məktəbin 3 layihəsi qalib gəlmiş və reallaşmışdır. 2008-ci ildə Prezident İlham Əliyevin Sərəncamı ilə məktəbə “İlin ən yaxşı ümumtəhsil məktəbi” fəxri adı verilmişdir.
Lahıc orta məktəbinin məzunları siyahısında ilk qadın gəmi kapitanı Şövkət Səlimova, Əməkdar elm xadimi Soltan Mehdiyev, ictimai-siyasi və dövlət xadimi Hökumə Sultanova və digərləri var.
26 avqust 2018-ci ildə Lahıc qəsəbəsində yeni məktəb binası istifadəyə verilmişdir.
İstinad edilən mənbələr:
