Zaqatala rayonunun Suvagil kəndində təhlükəli vəziyyət yaranıb.
Bizim.Media-nın məlumatına görə, kənd ərazisində yerləşən bəzi elektrik dirəkləri aşınaraq əyilib və yaşayış evlərinin üzərinə doğru istiqamət alıb. Sakinlər bildirirlər ki, dirəklərdən biri artıq evin damına qədər əyilib və hər an aşma riski var.
Sakinlərin sözlərinə görə, kənddəki köhnə və çürümüş taxta dirəklər xüsusilə küləkli və yağışlı havalarda daha da təhlükəli vəziyyətə düşür. Bu isə həm evlərə ziyan vura bilər, həm də insanların həyatı üçün risk yaradır.
Kənd sakini Xədicə Əliyeva qeyd edib ki, Suvagilin bir sıra küçə və məhəllələrində oxşar problemlər müşahidə olunur. Onun sözlərinə görə, məsələ ilə bağlı aidiyyəti qurumlara müraciət olunsa da, hələlik konkret tədbirlər görülməyib.
Sakinlər vəziyyətin aradan qaldırılması üçün köhnə dirəklərin yenilənməsini və təhlükə yaradan hallar üzrə operativ addımların atılmasını xahiş edirlər.
Məsələ ilə bağlı yerli qurumlar problemdən xəbərdar olduqlarını bildirərək, yaxın günlərdə müvafiq tədbirlərin görüləcəyini qeyd ediblər.
