Qusar rayonunun Yuxarı Tahircal kəndində uzun müddətdir davam edən işıq problemi nəhayət həllini tapıb.
Shimal.News-un məlumatına görə, cari ilin aprel ayında yağan güclü qar nəticəsində kəndin çox sayda elektrik dayaqları aşıb, naqillər qırılıb və hava xətti tamamilə sıradan çıxmışdı. Nəticədə kənd sakinləri 10 gün ərzində elektrik enerjisiz qalıb.
Enerji təminatının dayanıqlığını artırmaq məqsədilə Yuxarı Qələnxur kəndindən Yuxarı Tahircal istiqamətində 9 km məsafədə yeni elektrik xətti çəkilib. Layihə çərçivəsində 251 ədəd 10 kV-luq kompozit dayaqlar, 30 km uzunluğunda izolyasiyalı naqillər və 750 ədəd izolyator quraşdırılıb.
Qusar Rayon İcra Hakimiyyətinin başçısı Sahir Məmmədxanov və “Azərişıq” ASC-nin Xaçmaz Regional Enerji Təchizatı və Satışı İdarəsinin rəsmiləri görülən işlərlə yerində tanış olublar.
Yuxarı Tahircal kəndinin elektrik təminatı şəbəkəsi 1960-cı ildə qurulub. Kəndi qidalandıran 10 kV-luq hava elektrik verilişi xətti Əcəxur 35 kV-luq yarımstansiyasından çıxan Sudur xəttinə qoşulub.
