Xaçmaz rayonunun böyük yaşayış məntəqələrindən biri olan Nərəcan kəndinin yolları sakinlərin səbr kasasını daşırıb. İllərdir təmir görməyən əsas küçədə – məktəbin qarşısından dəmir yolu keçidinə qədər uzanan yolda vəziyyət gündən-günə daha da ağırlaşır.
Shimal.News-a müraciət edən kənd sakinləri bildiriblər ki, küçədə hər addımda iri çuxurlar var, bəziləri isə palçıq və su ilə dolaraq təhlükəyə çevrilib:
"Yayda tozdan göz-gözü görmür, qışda isə palçıqdan keçmək mümkün deyil. Yağış yağan kimi çuxurlar su ilə dolur, altında nə olduğunu görmürük. Maşınlar batır, piyadalar yıxılır, ayağı burxulan da olur, üst-başını palçığa bulayan da".
Ən çox əziyyət çəkənlər isə məktəblilərdir. Sakinlərin sözlərinə görə, uşaqlar hər gün bu kələ-kötür, bataqlığa çevrilmiş yolla məktəbə gedib-gəlməyə məcburdur.
Bundan başqa, kənddə qaz və su xətlərinin bir hissəsi yol səviyyəsindən hündürdə qaldığı üçün avtomobillər tez-tez sıradan çıxır.
Sakinlər vəziyyətlə bağlı narazıdır:
"Sanki unudulmuşuq. İllərdir yolda heç bir iş görülmür. Bu yol gündəlik işə, məktəbə, xəstəxanaya gedən yüzlərlə insanın həyatını çətinləşdirir".
