Xudat şəhərində piyadaların təhlükəsizliyini təhdid edən qaz xətti uzun müddətdir ki, qəzalı vəziyyətdə qalıb.
Shimal.News-a daxil olan məlumata görə, şəhərin əsas küçələrindən biri olan Axundov küçəsində qaz xətti səkinin üzərinə doğru əyilib. Nəticədə piyadaların hərəkəti çətinləşib və ərazidə təhlükəli vəziyyət yaranıb.
Sakinlərin sözlərinə görə, problem artıq 15 gündən çoxdur davam etsə də, indiyədək onun aradan qaldırılması istiqamətində hər hansı tədbir görülməyib.
Onlar bildirirlər ki, Axundov küçəsi Xudatın ən intensiv hərəkət olan ərazilərindən biridir. Hər gün məktəblilər, yaşlı insanlar və yüzlərlə piyada bu səkidən istifadə edir. Əyilmiş qaz xətti isə həm insanların rahat hərəkətinə mane olur, həm də istənilən an xoşagəlməz hadisəyə səbəb ola bilər.
Sakinlər hesab edirlər ki, qaz xəttinin bu vəziyyətdə qalması həm insanların xəsarət alması, həm də qaz borusunun zədələnərək daha ciddi təhlükə yaratması riskini artırır.
Vətəndaşlar "Azəriqaz" İstehsalat Birliyini və digər aidiyyəti qurumları əraziyə baxış keçirərək təhlükəli vəziyyəti təxirəsalınmadan aradan qaldırmağa çağırırlar. Onların sözlərinə görə, belə hallarda problemə yalnız hadisə baş verdikdən sonra deyil, risk yaranan kimi müdaxilə edilməlidir.
