Xaçmaz rayonu Xudat şəhər 4 nömrəli məktəb-liseylə bağlı şikayət var.
Shimal.News-a danışan valideynlərin sözlərinə görə, artıq iki həftədən çoxdur ki, məktəbdə istilik sistemi işləmir.
"İki həftədən artıqdır ki, uşaqlarımız soyuqla mübarizə aparır. Məktəb rəhbərliyi və müəllimlərlə bu problemlə bağlı danışsaq da, heç bir nəticə yoxdur. Onlar bildirirlər ki, bu məsələyə görə məsuliyyət daşımırlar. Xəstəliklərin yayıldığı bu mövsümdə uşaqlarımızı soyuq sinif otaqlarına necə göndərək? Uşaqlarımızın sağlamlığı üçün narahatıq", - deyə valideynlər bildiriblər.
Məsələ ilə bağlı Quba-Xaçmaz Regional Təhsil İdarəsinin əməkdaşı Murad Qəribov sorğumuza cavab olaraq bildirib ki, mövcud vəziyyətdən xəbərdardırlar.
"Quba-Xaçmaz Regional Təhsil İdarəsinin tabeliyində fəaliyyət göstərən Xaçmaz rayonu Xudat şəhəri 4 nömrəli məktəb-liseydə istilik təminatı ilə bağlı yaranmış mövcud vəziyyətdən xəbərdarıq. Qeyd edirik ki, istilik sistemi xətlərində yaranmış nasazlıqla əlaqədar aidiyyəti üzrə məlumat verilib, hazırda problemin aradan qaldırılması istiqamətində zəruri tədbirlər görülür.
Qısa müddət ərzində məktəbin istilik təminatında yaranmış problemin tam aradan qaldırılması və tədris prosesinin normal şəraitdə davam etdirilməsi təmin ediləcək".
