Qubanın dağlıq ərazilərində yağan güclü qar Macarıstandan gələn bir turistin təhlükəli vəziyyətdə qalmasına səbəb olub.
Shimal.News-un əldə etdiyi məlumata görə, "Hyundai" markalı avtomobil ilə Xınalıq kəndindən geri qayıdan əcnəbi turist hava şəraitinin qəfil pisləşməsi nəticəsində Qımıl kəndi yaxınlığında yolda ilişib qalıb və hərəkət edə bilməyib.
Hadisə barədə məlumat alan polis əməkdaşları dərhal əraziyə yollanıb. Yolda qalan turistə kömək göstərilib, avtomobil təhlükəsiz yerə çıxarılıb. Polis əməkdaşları sərnişinin sağlamlığını və vəziyyətini yoxladıqdan sonra onu müşayiət edərək Quba şəhərində yerləşən hotellərdən birinə çatdırıblar.
Turistin vəziyyətinin normal olduğu, heç bir xəsarət almadığı bildirilib. O, göstərilən dəstəyə görə hüquq-mühafizə orqanlarına təşəkkür edib.
Qeyd edək ki, son günlər Qubanın dağlıq kəndlərində, xüsusən Xınalıq istiqamətində qarın intensiv yağması səbəbindən yollarda buzlaşma yaranır və sürücülərə ehtiyatlı olmaları tövsiyə olunur.
