Quba-Xınalıq yolunun üzərində uçan Əlik körpüsünün yenidən tikilməsi "Körpü Bina-Tikinti" MMC tərəfindən icra olunur.
Bizim.Media-nın məlumatına görə, artıq beton özülü qoyulub. İnşa işləri hava şəraitinə uyğun olaraq aparılır. Yeni körpünün uzunluğunun 10, eninin isə 4,5 metr olması planlaşdırılır.
Quba 5 saylı Yol İstismar İdarəsinin sahə rəisi Bilal Sultanov Bizim.Media-ya açıqlamasında bildirib ki, körpünün tikintisi məsuliyyət və bacarıq tələb edir:
“Körpünün möhkəm və uzunömürlü olması bünövrəsinin düzgün, eləcə də keyfiyyətli qoyulmasından çox asılıdır. Qış aylarında hava imkan verdikcə işlər aparılacaq, bu səbəbdən körpünün istifadəyə veriləcəyi tarix hələ məlum deyil”.
Bu ilin iyul ayında güclü sel Əlik körpüsünü uçurub və 5 kəndin əhalisi yol baxımından çətinlik çəkir. Sakinlər alternativ Susay-Quba yolundan istifadə edirlər. Bu yol isə qış aylarında əlverişli deyil. Ona görə camaat yeni körpünün istifadəyə veriləcəyini səbirsizliklə gözləyirlər.
