Xaçmazın Şıxlar kəndində elektrik təminatı acınacaqlı vəziyyətdədir.
Yerli sakinlərin Shimal.News-a verdiyi məlumata görə, son 6 ayda gündə 3-4 dəfə elektrik kəsintisi baş verir. Son günlər isə fasilələr daha uzun çəkir — elektrik enerjisinin təminatında hər dəfə ən azı 5 saatlıq fasilə yaranır.
“Çox xahiş edirik, işıqsız günümüzü işıqlandırasınız. Qaranlıqda qalmaqdan bezmişik. Bütün günü işıqlarımızı söndürürlər, yalnız gecələr yandırırlar. Hər dəfə idarəyə zəng edəndə isə “qəza baş verib” deyirlər. Kəndimizin elektrik təsərrüfatı qurulanda, burada cəmi 50 ev var idi, bu gün isə 120-dən çox ev var. Təbii ki, kabellərin və transformatorların gücü yüklənməyə dözmür”, - deyə sakinlər bildiriblər.
Onlar əlavə ediblər ki, elektrik cərəyanı zəif olduğu üçün çilçırağı yandıranda belə evdə fənərlərdən istifadə etmək məcburiyyətində qalırlar.
Rayon mərkəzindən 15 km aralıda yerləşən Şıxlar kəndi qədim tarixə malikdir. Burada tarixi qəbiristanlıq, XV əsrə aid Yusif türbəsi, XIX əsrə aid Altıüzlü türbə, XIV-XVI əsrlərə aid Şıxlar kənd məscidi var. 1915-ci ildə aparılan əhalinin siyahıyaalınması məlumatına əsasən, kənddə 63 nəfər yaşayırdı. 2009-cu ildə isə əhalinin sayı 363 nəfər olub.
