Xaçmaz şəhərinin Bakı prospektində yerləşən "Xaçmaz dairəsi”ndə tez-tez piyadaların iştirakı ilə avtomobil qəzaları qeydə alınır.
Shimal.News həmin ərazidən piyadaların necə yolu keçdiklərini göstərən görünülər əldə edib.
Xudat, Quba, Qusar, Bakı istiqamətində hərəkət etən sərnişinlər adətən dairə ətrafındakı taksilərdən istifadə edirlər. Bu səbəbdən də sözügedən ərazidən gün ərzində minlərlə insan keçir. Sərnişinlərin sözlərinə görə isə dairədən təhlükəsiz keçmək artıq sürücülərin insafına və diqqətinə qalıb:
"Yol verən olsa, rahat keçirik. Ərazidə avtomobillər intensiv hərəkət etdiyindən tez-tez qəza şəraiti yaranır. Dairə ətrafında çox sayda dükanlar, ictimai iaşə obyektləri var. Bu obyektlərə gələn insanlar da hərəkətdə olan avtomobillərin arasında keçməli olurlar. Ərazidə piyada keçidləri təşkil olunsa, ağır qəzaların, piyadaların ölümünün qarşısını almaq olar", - deyə vətəndaşlar bildirib.
Sonuncu dəfə ötən gün həmin ərazidə piyadanın ölümü ilə nəticələnən ağır yol-nəqliyyat hadisəsi baş verib. "KamAz" markalı yük avtomobili 75 yaşlı Quba rayonunun Vəlvələ kənd sakini Cəbrayıl Zamanlını vuraraq öldürüb.
