Xaçmaz şəhərində binanın fasadının uçması piyadalar üçün təhlükəli vəziyyət yaradıb.
Shimal.News xəbər verir ki, hadisə şəhərin Nəriman Nərimanov küçəsində ("Qayalı Market"in yaxınlığında) yerləşən binada baş verib.
Sakinlərin sözlərinə görə, binanın daş üzlüyünün bir hissəsi qoparaq piyada səkisinə düşüb. Bildirilir ki, fasadda qopma prosesi hələ də davam edir.
Hadisənin dünən axşam baş verməsinə baxmayaraq, ərazi təhlükəsizlik məqsədilə hasarlanmayıb, xəbərdaredici nişanlar quraşdırılmayıb və piyadaların hərəkəti məhdudlaşdırılmayıb.
Sakinlər aidiyyəti qurumlardan təhlükənin aradan qaldırılması və ərazidə təxirəsalınmaz təhlükəsizlik tədbirlərinin görülməsini xahiş edirlər.
