Xaçmaz şəhəri, Nəriman Nərimanov küçəsində sakinlər bir çox problemlərdən - günlərlə daşınmayan məişət tullantıları, dağılan asfalt, asfaltdan xeyli aşağıda olan lyuklardan əziyyət çəkirlər.
Məsələ ilə bağlı Shimal.News-a danışan yerli sakinlərin sözlərinə görə, uzun müddətdir yolun müxtəlif hissələrində iri çuxurlar yaranıb:
“Avtomobillər tez-tez bu çuxurlara düşərək zərər görür. Xüsusilə qaranlıqda çuxurlar nəzərə çarpmır. Yağış yağdıqda ərazi keçilməz olur, gölməçələr yaranır. Piyada zolağının olmaması da ayrı problemdir. Piyadalar məcburən dağılan yolun ortası ilə hərəkət edirlər. Sürücülər su ilə dolmuş çuxurları fərq etmir, nəticədə avtomobillərin təkərləri suyu piyadaların üstünə sıçradır.
Eyni zamanda, asfatldan xeyli aşağıda olan lyuklara da, günlərlə daşınmayan zibilin yaydığı üfunət qoxusuna da illərdir çarə tapılmır”,- deyə sakinlər bildiriblər.
Yerlilər onu da qeyd ediblər ki, burada Xaçmazın bir sıra vəzifəli şəxsləri də yaşayır.
