Xaçmaz şəhərinin Bakı prospektində yerləşən yerüstü piyada keçidləri və onların vəziyyəti sakinlərin narazılığına səbəb olub.
Shimal.News-a müraciət edən vətəndaşlar bildirirlər ki, keçidlər həddindən artıq hündür inşa edildiyi üçün onlardan istifadə edənlərin sayı çox azdır. Xüsusilə yaşlılar, əlilliyi olan şəxslər və uşaq arabası ilə hərəkət edən valideynlər üçün bu keçidlər əlverişli hesab edilmir.
Bundan başqa, keçidlərin bir sıra hissələrində üzlük daşları qopub, bəzi konstruksiya elementləri aşınıb və baxımsızlıq açıq şəkildə hiss olunur. Ərazidə olan açıq elektrik naqilləri də əlavə təhlükə yaradır.
Sakinlərin sözlərinə görə, həmin keçidlərdən istifadə çətin olduğundan bir çox piyada yolu birbaşa avtomobil hərəkət hissəsindən keçməyə üstünlük verir. Bu isə yol-nəqliyyat hadisələrinin baş vermə riskini artırır.
Vətəndaşlar aidiyyəti qurumları keçidlərdə əsaslı təmir işləri aparmağa, panduslar və digər əlçatanlıq vasitələri quraşdırmağa, həmçinin prospekt boyunca təhlükəsiz piyada keçidlərinin yaradılmasını nəzərdən keçirməyə çağırırlar.
