Xaçmaz şəhərinin Məktəbli və M.Qudyalçaylı küçələrini birləşdirən adsız və xəritədə olmayan küçənin təmirə ehtiyacı var.
Shimal.News xəbər verir ki, hər gün yüzlərlə sakinin, məktəblinin, azyaşlının istifadə etdiyi 100 metrlik küçə yağıntılı havada keçilməz hala gəlir.
Azyaşlılar palçığa bata-bata, gölməçələrdə islana-islana bu keçiddən keçərək Xaçmaz şəhər 6 saylı Körpələr Evi - Uşaq bağçasına, Xaçmaz şəhər 8 saylı tam orta məktəbə gedirlər.
Qeyd edək ki, şəhərin N.Nərimanov, M.Qudyalçaylı küçələrindən Məktəbli küçəsinə aparan ən yaxın yol bu aralıq məhəllədən keçir. Təxminən 2 metr eni, 100 metrə yaxın uzunluğu olan bu keçid 6 saylı Körpələr Evi - Uşaq bağçası ilə fərdi yaşayış evlərinin arasında yerləşir. Məktəbə, bağçaya, işə gedən hər kəs əlavə yol qət etməmək üçün bu daşlı, palçıqlı ara məhəllədən keçməklə yollarını qısaldırlar. Qısalan məsafə isə, nə az, nə çox 500 metrə yaxındır.
