Xaçmaz şəhərinin İzmaylovka adlanan ərazisində içməli suyun küçəyə axması vətəndaşların narazılığına səbəb olub.
Shimal.News-a danışan Salatın Əsgərova küçəsinin sakinlərinin sözlərinə görə, təxminən 100 metrlik su xəttinin müxtəlif hissələrində artıq 8 dəfə təmir işi aparılıb. Buna baxmayaraq, problem hər dəfə yenidən yaranır.
Sakinlər bildirirlər ki, sonuncu dəfə may ayında xəttdə təmir aparılıb. Lakin aradan uzun müddət keçmədən su yenidən küçəyə axmağa başlayıb.
Onların sözlərinə görə, aidiyyəti qurumun əməkdaşları əsaslı təmir üçün vəsait olmadığını bildirirlər.
Sakinlər isə su itkisinin hər gün davam etdiyini vurğulayaraq sual edirlər:
"Əsaslı təmir üçün vəsait yoxdursa, küçəyə axaraq israf olunan suyun dəyəri necə hesablanır?"
Vətəndaşların sözlərinə görə, eyni xəttdə dəfələrlə aparılan xırda təmir işləri problemin həllinə kömək etmir. Hər dəfə suyun küçəyə axması həm içməli su itkisinə, həm də ərazidə antisanitar vəziyyətin yaranmasına səbəb olur.
Sakinlər aidiyyəti qurumdan boru xəttinin əsaslı şəkildə yenilənməsini və problemin birdəfəlik həllini istəyirlər.
Onlar hesab edirlər ki, eyni nöqtədə dəfələrlə təmir aparmaq əvəzinə, nasazlığın əsas səbəbi müəyyənləşdirilməli və xətt tam bərpa olunmalıdır.
