Xaçmazda Azərbaycan Avtomobil Yolları Dövlət Agentliyi tərəfindən yolların əsaslı təmiri üçün layihə hazırlanıb. Burada 30-a yaxın yaşayış məntəqəsinin asfaltlanacağı gözlənilir. Həmin siyahıda Hacıqurbanoba kəndinin olmaması vətəndaşlar tərəfindən birmənalı qarşılanmayıb.
Bu barədə Shimal.News-a məlumat verən yerli sakinlər bildirirlər ki, 100-ə yaxın evi olan bu kəndin Fərid Seyfullayev, Hüseyin Sultanov və Elşad Qayımov kimi mərd oğulları şəhidlik zirvəsinə ucalıblar. Hətta onların yaşadıqları evlərin qarşısında belə yollar acınacaqlı vəziyyətdədir.
“Ümumilikdə Hacıqurbanobada yollar pis vəziyyətdədir. Yağış yağanda piyadalar üçün çətinlik yaranır. Kəndimizdə 3 şəhid ailəsi var, bir neçə dəfə qurumlara vəziyyətlə bağlı şikayət edilib, lakin məsələyə baxılmır. Bir neçə ildir yolların asfaltlanacağı deyilirdi. Amma yeni layihəyə kəndimizin adı əlavə edilməyib”,- deyə sakinlər bildirib.
