Xaçmaz rayon sakini Qurban Alqayev dələduzluğa məruz qaldığını iddia edir.
Baku TV-nin məlumatına görə, şikayətçi bildirib ki, 2024-cü il mayın 1-dən etibarən Xaçmaz şəhəri Nərimanov küçəsində yerləşən şadlıq evində tikinti və fasad işlərini həyata keçiriblər. Onun sözlərinə görə, ümumi dəyəri 150 min manat olan işlər tam başa çatdırılsa da, bu günədək heç bir ödəniş edilməyib.
Q.Alqayev iddia edir ki, sifarişçi Çingiz Məmmədov ödənişdən yayınır və zənglərə cavab vermir: "150 min manatlıq iş görmüşük, lakin pulu vermirlər. İşçilərə və material aldığımız yerlərə borcumuz qalıb".
O əlavə edib ki, tərəflər arasında rəsmi müqavilə olsa da, qarşı tərəf müxtəlif bəhanələrlə ödənişdən imtina edir. Şikayətçinin sözlərinə görə, sifarişçi pulu başqa şəxslərə verdiyini bildirərək məsuliyyəti üzərindən atmağa çalışır.
Məsələ ilə bağlı Daxili İşlər Nazirliyinin Quba regional qrupundan bildirilib ki, hər iki tərəfin Xaçmaz Rayon Polis Şöbəsinə müraciəti əsasında araşdırmalara başlanılıb.
Hazırda fakt üzrə istintaq tədbirləri davam etdirilir. Araşdırmanın nəticəsindən asılı olaraq məsələyə hüquqi qiymət veriləcəyi bildirilib.
