Xaçmaz şəhəri ərazisindən keçən Qudyalçayda intensiv yağıntılar ciddi fəsadlara səbəb olub.
Shimal.News xəbər verir ki, güclü sel nəticəsində şəhərin girişində yerləşən avtomobil körpüsündən Köhnə Xaçmaz piyada körpüsünə qədər olan hissəsində sahil mühafizə bəndləri dağılıb. Hər iki sahildə quraşdırılmış beton konstruksiyalar selin təsirinə tab gətirməyərək yerindən qopub və qismən çay yatağına aşıb.
Bəndlərin sıradan çıxması sahilboyu torpaq qatının yuyulmasına səbəb olub, nəticədə ərazidə uçqun riski xeyli artıb. Xüsusilə Köhnə Xaçmaz piyada körpüsünün alt hissəsində yerləşən bəndlərin aşmaq üzrə olması körpünün dayanıqlığı üçün ciddi təhlükə yaradır.
Təbii hadisə nəticəsində ərazidən keçən rabitə xətləri də zədələnib, bir sıra kabellər və dayaqlar yararsız hala düşüb.
Hazırda ərazidə bərpa və sahilbərkitmə işlərinə başlanılmayıb. Mövcud vəziyyət birbaşa subasma təhlükəsi yaratmasa da, sahil eroziyasının davam etməsi riskləri artırır.
