Xaçmaz şəhərində qəzalı vəziyyətdə olan ağac sakinləri narahat edir.
Shimal.News-un məlumatına görə, şəhərin Nəriman Nərimanov küçəsi 80C ünvanında yerləşən çoxmənzilli yaşayış binasının qarşısındakı iri gövdəli şam ağacı avtomobil yoluna və yaxınlıqdakı qarajların üzərinə doğru əyilib.
Sakinlər bildirirlər ki, ağacın iri budaqları həm piyadalar, həm də nəqliyyat vasitələri üçün ciddi təhlükə yaradır. Xüsusilə küləkli hava şəraitində onun aşma riskinin artdığı qeyd olunur.
Eyni zamanda, ağacın altında avtomobillərin park edilməsi mümkün qəza zamanı maddi zərərin yaranması ehtimalını artırır. Yaxınlıqdan keçən elektrik və rabitə xətlərinin zədələnə biləcəyi də vurğulanır.
Sakinlər aidiyyəti qurumlardan qəzalı vəziyyətdə olan ağacla bağlı təxirəsalınmaz tədbirlərin görülməsini, onun budanmasını və təhlükənin aradan qaldırılmasını xahiş edirlər.
