Xaçmaz rayonunda qəhvəyi mərmər bağacığına qarşı aparılan mübarizə tədbirləri media nümayəndələrinin iştirakı ilə nümayiş etdirilib.
Shimal.News xəbər verir ki, tədbir çərçivəsində əvvəlcə Quba Regional Təlim Mərkəzində zərərvericinin yayılma xüsusiyyətləri, kənd təsərrüfatına vurduğu ziyan və mübarizə üsulları barədə təqdimat keçirilib. Mütəxəssislər bildiriblər ki, qəhvəyi mərmər bağacığı 300-dən çox bitki növünə ziyan vursa da, insan sağlamlığı üçün təhlükə yaratmır.
Daha sonra Xaçmazda zərərvericinin yayıldığı ərazilərdə monitorinq və kimyəvi mübarizə tədbirləri nümayiş etdirilib. Qeyd olunub ki, zərərvericinin təbii düşməni sayılan samuray arısının laboratoriya şəraitində çoxaldılması və bioloji mübarizədə tətbiqi planlaşdırılır.
Məlumata görə, Aqrar Xidmətlər Agentliyi tərəfindən qışlama dövründə ölkənin 34 rayonunda 20 mindən çox nöqtədə monitorinq aparılıb. Hazırda qəhvəyi mərmər bağacığı 12 rayonda, o cümlədən Xaçmaz, Quba, Qusar, Şəki, Zaqatala və Şabranda müşahidə olunur.
Bildirilib ki, ötən il zərərvericiyə nəzarət məqsədilə 13 mindən çox feromon tələsi quraşdırılıb. Bu il isə həmin rəqəmin 20 mini keçməsi nəzərdə tutulur.
Aqrar Xidmətlər Agentliyi tərəfindən qəhvəyi mərmər bağacığına qarşı monitorinq, maarifləndirmə və mübarizə tədbirləri davam etdirilir.
