Xaçmaz şəhərinin H.Əliyev prospektindəki (köhnə polis şöbəsinin yaxınlığında) piyada keçidi ilə bağlı təhlükəli vəziyyət yaranıb.
Shimal.News-a danışan sakinlərin sözlərinə görə, keçidin yol nişanı ağacların arasında qaldığından sürücülər tərəfindən vaxtında görünmür. Eyni zamanda, piyada keçidinin zolaqları da demək olar ki, silinib.
Şikayətçilər bildirirlər ki, avtomobillər həmin ərazidə döngəyə yüksək sürətlə daxil olur. Bu da piyadaların həyatını real risk altına salır.
"Ötən həftə burada bir avtomobil sürətlə hərəkət edərək daha üç nəqliyyat vasitəsinə çırpıldı. Ərazidə müşahidə kamerası da yoxdur. Əgər həmin vaxt piyadanı vursaydı, nəticəsi daha ağır ola bilərdi", – deyə sakinlər narahatlıqlarını ifadə ediblər.
Vətəndaşlar aidiyyəti qurumlardan piyada keçidinin yenidən nişanlanmasını, yol nişanının görünən vəziyyətə gətirilməsini və ərazidə təhlükəsizlik tədbirlərinin gücləndirilməsini istəyirlər.
