Xaçmaz rayonunun Qalağan kəndində yerləşən və Cağacıqçayın üzərindən keçən körpü çökmək üzrədir.
Bu haqda Shimal.News-a yerli sakinlər məlumat veriblər. Onların sözlərinə görə, son günlər yağan yağışlar və çaya gələn güclü sel nəticəsində körpü zədələnib və qəzalı vəziyyətə düşüb.
Sakinlər hesab edir ki, körpünün üzərində hərəkət edən nəqliyyat vasitələri və piyadalar üçün ciddi təhlükə var. Qurğunun bir neçə dayağı zəifləyib və hər an uçma təhlükəsi var.
"Biz neçə gündür qorxu içindəyik. Körpüdən istifadə etməyə məcburuq, baxmayaraq ki, onun hər an uçacağından ehtiyat edirik. İndiyə qədər xəsarət alan olmasa da, artıq vəziyyət kritikdir. Aidiyyəti qurumlar gəlib baxış keçirsinlər, yoxsa gec olacaq", - deyə kənd sakinlərindən biri bildirib.
