Xaçmaz rayonunun İstisu qəsəbəsində kiçikhəcmli gəmi istifadəçiləri üçün maarifləndirici tədbir keçirilib.
Shimal.News xəbər verir ki, tədbir Fövqəladə Hallar Nazirliyinin Kiçikhəcmli Gəmilərə Nəzarət və Sularda Xilasetmə Dövlət Xidməti tərəfindən "Kiçikhəcmli gəmilərin təhlükəsiz istismarı" mövzusunda təşkil olunub.
Tədbirdə iştirakçılara kiçikhəcmli gəmilərin təchizat avadanlıqları, texniki nəzarət qaydaları və qanunvericiliyin tələbləri barədə ətraflı məlumat verilib. Bildirilib ki, su nəqliyyatı vasitələrinin vaxtında texniki baxışdan keçirilməsi və sürücülərin müvafiq idarəetmə vəsiqəsinə malik olması təhlükəsizliyin əsas şərtlərindəndir.
Bununla yanaşı, gəmi sürücülərinə kollektiv və fərdi xilasedici vasitələrdən, eləcə də naviqasiya avadanlıqlarından düzgün istifadə qaydaları izah olunub.
Tədbirin sonunda iştirakçılara kiçikhəcmli gəmilərin təhlükəsiz istismarına dair maarifləndirici broşürlər paylanılıb.
