Xaçmaz şəhərində Quba yoluna çıxış hissəsində quraşdırılan yeni radar sistemi sürücülər arasında çaşqınlıq yaradıb. Radarın yerləşdiyi ərazidə sürət həddi ilə bağlı yol nişanlarının bir-birinə uyğun gəlməməsi narazılığa səbəb olur.
Shimal.News-un məlumatına görə, Quba-Xaçmaz avtomobil yolunda ümumi sürət həddi 60 km/saat təşkil edir. Quba istiqamətindən hərəkət edən sürücülər radara yaxınlaşarkən əvvəlcə 60 km/saat sürət məhdudiyyəti nişanı ilə qarşılaşırlar. Lakin radara bir qədər qalmış yol kənarında 40 km/saat sürət həddini göstərən nişan mövcuddur.
Sürücülərin bildirdiyinə görə, 40 km/saat nişanı yolun əvvəlki təmir dövründən qalıb və hazırkı yol şəraitinə uyğun deyil. Bu isə radarın hansı sürət həddini əsas götürəcəyi ilə bağlı qeyri-müəyyənlik yaradır və sürücülər üçün cərimə riskini artırır.
