Xaçmaz şəhərinin mərkəzi küçələri baxımsız vəziyyətdədir. Bu haqda ShimalNews 13 avqust tarixində “Report”a məlumat verir.
Sakinlər bildiriblər ki, “Vağzal”, Atatürk, Əliağa Şıxliniski, Elçin Tahirov, Engels, 20 Yanvar, H.Z.Tağıyev və N.Nərimanov küçələrində asfalt örtüyü dağılıb. Çala-çuxurlar yollarda həm piyadaların, həm də avtomobillərin hərəkətini xeyli çətinləşdirir. Yağışda isə gölməçəyə çevrilən bu küçələrdən keçmək mümkün olmur.
Rayon icra hakimiyyəti başçısının müavini Bəxtiyar Osmanov bildirib ki, şəhər ərazisində daxili yolların təmir olunması üçün müvafiq müraciət hazırlanıb.
“Regionların inkişafı sahəsində uğurla həyata keçirilən dövlət proqramlarında kommunal xidmətlərin və sosial infrastruktur təminatının keyfiyyətinin yüksəldilməsi məqsədi ilə görülən işlər Xaçmaz rayonunda da öz töhfəsini verməkdədir. Sözügedən küçələrin asfalt örtüyünün yenilənməsi üçün lazımı tədbirlər görülüb. Vəsait ayrılan kimi işlərin icrasına başlanacaq”-deyə Osmanov qeyd edib.
