Külli miqdarda rüşvət almaqda təqsirləndirilən bir qrup keçmiş vəzifəli şəxsin kassasiya şikayəti üzrə məhkəmə prosesi yekunlaşıb.
Pravda.az-ın məlumatına görə, məlumata görə, Ali Məhkəmədə baxılan iş üzrə verilən kassasiya şikayətləri təmin edilməyib və əvvəlki məhkəmə qərarları qüvvədə saxlanılıb.
İş üzrə təqsirləndirilən şəxslər arasında Əmlak Məsələləri Dövlət Xidmətinin Xaçmaz, Şəki və Qəbələ ərazi şöbələrinin keçmiş rəhbərləri də yer alıb. İttihama əsasən, onlar və digər vəzifəli şəxslər rüşvət alma, vəzifə səlahiyyətlərindən sui-istifadə və nüfuz alveri kimi əməllərdə təqsirləndiriliblər.
Bakı Ağır Cinayətlər Məhkəməsinin hökmü ilə Əmlak Məsələləri Dövlət Xidmətinin Torpaqların dövlət idarəetməsinin təşkili və geodeziya şöbəsinin sektor müdiri İldırım Məmmədov 8 il 6 ay, Şəki ərazi şöbəsinin keçmiş müdiri Nazim Səfərov isə 8 il 4 ay müddətinə azadlıqdan məhrum edilib.
Xaçmaz ərazi şöbəsinin keçmiş müdiri Amil Aslanov, Qəbələ ərazi şöbəsinin keçmiş müdiri Aydın Cəfərov və digər təqsirləndirilən şəxslər barəsində isə müxtəlif müddətlərə vəzifə tutma qadağası və digər cəzalar tətbiq olunub.
Ali Məhkəmənin son qərarı ilə həmin hökmlər dəyişdirilmədən qüvvədə saxlanılıb.
