Xaçmaz şəhəri Səid Qurbanov küçəsinin sakinləri gecə saatlarında yaranan səs-küy və ictimai asayişin pozulmasından şikayətçidirlər.
Onlar Shimal.News-a bildiriblər ki, "Al market"in qarşısında fəaliyyət göstərən kafenin müştəriləri gecə saatlarında ərazidə yüksək səslə musiqi səsləndirir, tez-tez mübahisələr və dava-dalaş salırlar.
"Gecə saatlarında sanki konsert başlayır. Səs-küy, qışqırıq olur, bəzən münaqişələr dava ilə nəticələnir", – deyə sakinlər bildiriblər.
Şikayətçilər qeyd edirlər ki, yaranan vəziyyət onların rifahına ciddi mane olur və ərazidə təhlükəsizliklə bağlı narahatlıq yaradır.
Sakinlər məsələnin aidiyyəti qurumlar tərəfindən araşdırılmasını və qanunvericiliyə uyğun tədbirlərin görülməsini gözlədiklərini vurğulayıblar.
