Quba-Xaçmaz iqtisadi rayonu üzrə ən uğurlu məktəblər açıqlanıb.
Bu barədə 2025-ci ilə aid tələbə qəbulu və ümumi təhsil müəssisələri üzrə buraxılış imtahanlarının nəticələrinə dair elmi-statistik materialların yer aldığı "Abituriyent" jurnalının 12-ci nömrəsində məlumat verilib.
Xaçmaz rayonunda 2025-ci ildə ümumtəhsil müəssisələrini 2004 şagird bitirib, onların 1997-si buraxılış imtahanında iştirak edib. Rayon məzunlarından 84 nəfər 500-dən, 19 nəfər isə 600-dən yuxarı bal toplayıb. Rayon üzrə yüksək nəticə göstərən məktəblər arasında 8 nömrəli şəhər tam orta məktəbi yer alıb.
Quba rayonunda 2025-ci ildə ümumtəhsil müəssisələrini 1578 şagird bitirib, onların 1572-si buraxılış imtahanında iştirak edib. Rayon məzunlarından 72 nəfər 500-dən, 14 nəfər isə 600-dən yuxarı bal toplayıb. Respublika üzrə ən yaxşı məktəblər siyahısına Quba Texniki-təmayüllü liseyi və Təbiət fənləri üzrə 2 nömrəli şəhər məktəb-liseyi daxil edilib. Rayon üzrə yüksək nəticə göstərən məktəblər sırasında isə A.Babayev adına Susay kənd və Püstəqasım kənd tam orta məktəbləri qeyd olunub.
Qusar rayonunda 2025-ci ildə ümumtəhsil müəssisələrini 930 şagird bitirib və onların hamısı buraxılış imtahanında iştirak edib. Rayon məzunlarından 32 nəfər 500-dən, 7 nəfər isə 600-dən yuxarı bal toplayıb. Respublika üzrə ən yaxşı məktəblər siyahısına 1 nömrəli şəhər, Həzrə kənd və Yuxarı Zeyxur kənd tam orta məktəbləri daxil edilib.
Siyəzən rayonunda 2025-ci ildə ümumtəhsil müəssisələrini 461 şagird bitirib, onların 460-ı buraxılış imtahanında iştirak edib. Rayon məzunlarından 32 nəfər 500-dən, 13 nəfər isə 600-dən yuxarı bal toplayıb. Rayon üzrə yüksək nəticə göstərən məktəblər arasında 1 və 2 nömrəli şəhər tam orta məktəbləri yer alıb.
Şabran rayonunda 2025-ci ildə ümumtəhsil müəssisələrini 640 şagird bitirib, onların 638-i buraxılış imtahanında iştirak edib. Rayon məzunlarından 34 nəfər 500-dən, 6 nəfər isə 600-dən yuxarı bal toplayıb. Rayon üzrə yüksək nəticə göstərən məktəblər sırasında 1 və 4 nömrəli şəhər, həmçinin Pirəmisən kənd tam orta məktəbləri qeyd olunub.
Məlumatlara əsasən, Quba-Xaçmaz iqtisadi rayonu üzrə 500-dən yuxarı bal toplayan məzunların sayına görə Xaçmaz (84 nəfər) ilk sırada qərarlaşıb. Onu Quba (72 nəfər), Şabran (34 nəfər), Qusar (32 nəfər) və Siyəzən (32 nəfər) izləyib.
Respublika üzrə ən yaxşı məktəblər siyahısında regiondan Quba və Qusar rayonlarının təhsil müəssisələri yer alıb. 600-dən yuxarı bal toplayan məzunların sayına görə isə Xaçmaz (19 nəfər) birinci, Siyəzən (13 nəfər) ikinci olub.
Mənbə: AzEdu.az
