Bu gün şəhidlərimiz - Ramil Yusifov və Rəşid Mədinovun doğum günüdür.
Rəşid Nəzər oğlu Mədinov 24 aprel 1996-cı ildə Xaçmaz rayonunun Yeni Həyat qəsəbəsində anadan olub. Əslən Quba rayonunun Qrız kəndindəndir.
2002-ci ildə Nazim İsayev adına tam orta məktəbin I sinfinə daxil olub, 2012-ci ildə 10-cu sinfi bitirib. Həmin il Bakı Dövlət Sosial-İqtisadi Kollecinin "Bank işi" ixtisasına qəbul olunub və 2015-ci ildə kolleci bitirib.
2015-ci ilin iyulunda həqiqi hərbi xidmətə çağırılan Rəşid əvvəlcə 3 ay Gəncədə xidmət edib, daha sonra Murovdağ istiqamətində xidmətini davam etdirib. Xidmət dövründə 2017-ci ilin əvvəlində ehtiyata buraxılıb. Onun hərbi xidmət müddəti 2016-cı ilin Aprel döyüşlərinə təsadüf edib. Döyüşlərdə göstərdiyi şücaətə görə 3 tərifnamə və 3 fərqlənmə diplomu ilə təltif olunub.
Rəşid Mədinov 2020-ci il sentyabrın 27-də başlayan Vətən müharibəsində iştirak edib. Murovdağ və Füzuli istiqamətlərində gedən döyüşlərdə artilleriya bölməsinin tərkibində qəhrəmanlıqla döyüşüb. Vətən müharibəsinin 16-cı günündə şəhid olub.
O, ölümündən sonra "Vətən uğrunda", "Döyüşdə fərqlənməyə görə" və "Füzulinin azad olunmasına görə" medalları ilə təltif edilib.
Ramil Mürşid oğlu Yusifov 24 aprel 1978-ci ildə İsmayıllı rayonunun Ağbulaq kəndində anadan olub.
Baş gizir Ramil Yusifov 2020-ci il sentyabrın 27-də başlayan Vətən müharibəsi zamanı Murovdağ istiqamətində gedən döyüşlərdə iştirak edib. O, oktyabrın 4-də həmin döyüşlərdə şəhid olub.
Ölümündən sonra "Vətən uğrunda", "Cəsur döyüşçü" və "Suqovuşanın azad olunmasına görə" medalları ilə təltif edilib.
