Bu gün şəhidlər - İsgəndər Allahverdiyev, Mayıl Kürəbəyov və İsmət İmanovun doğum günüdür.
İsgəndər Nəsir oğlu Allahverdiyev 1999-cu il aprelin 2-də Qax rayonunun Şotavar kəndində anadan olub.
2017-ci ilin aprel ayında həqiqi hərbi xidmətə çağırılıb, 2018-ci ilin oktyabrında xidmətini uğurla başa vurub.
O, 2020-ci il sentyabrın 27-də başlayan Vətən müharibəsində Şuşa istiqamətində gedən döyüşlərdə iştirak edib və noyabrın 8-də həmin istiqamətdə gedən döyüşlər zamanı şəhid olub.
İsgəndər Allahverdiyev ölümündən sonra "Vətən uğrunda", "Cəsur döyüşçü" və "Şuşanın azad olunmasına görə" medalları ilə təltif edilib.
İsmət Qismət oğlu İmanov 1998-ci il aprelin 2-də Ağsu rayonunun Ərəbmehdibəy kəndində anadan olub. Orta məktəbi bitirdikdən sonra 2016-cı il aprelin 4-də hərbi xidmətə yollanıb.
2020-ci il sentyabrın 29-dan etibarən könüllü əsgər kimi Vətən müharibəsində iştirak edib. 2020-ci il noyabrın 8-də Şuşa istiqamətində döyüş tapşırığını yerinə yetirərkən şəhid olub.
O, ölümündən sonra "Vətən uğrunda", "Şuşanın azad olunmasına görə", "Cəsur döyüşçü" medalları və "Azərbaycan Bayrağı" ordeni ilə təltif edilib.
Mayıl Kamran oğlu Kürəbəyov 2001-ci il aprelin 2-də Qusar rayonunun Urva kəndində anadan olub.
Orta təhsilini başa vurduqdan sonra 2019-cu ildə həqiqi hərbi xidmətə çağırılıb. Xidmətinin başa çatmasına az qalmış Vətən müharibəsi başlayıb.
Mayıl Kürəbəyov 2020-ci il oktyabrın 2-də Füzuli istiqamətində döyüş tapşırığını yerinə yetirərkən şəhid olub.
O, ölümündən sonra "Vətən uğrunda" və "Füzulinin azad olunmasına görə" medalları ilə təltif edilib.
