Suvarma sularının Quba-Xaçmaz avtomobil yoluna axması sürücülərin narazılığına səbəb olub.
Shimal.News-a müraciət edən yerli sakinlərin sözlərinə görə, bu vəziyyət Xaçmaz rayonu ərazisində Arzu qəsəbəsindən Yergüc kəndinədək uzanan hissədə müşahidə olunur.
İddia edilir ki, suvarma kanalları və arxlar uzun müddətdir lil və kol-kosdan təmizlənmədiyi üçün bağlara su verildikdə su yolun hərəkət hissəsinə axır. Nəticədə yolun bir zolağı su altında qalır. Xüsusilə Quba istiqamətində avtomobillər əks zolağa çıxmağa məcbur olurlar, on şüşədə görünüş məhdudlaşır, təkərlərin yol səthi ilə əlaqəsi zəyifləyir.
Nəticədə qəza riski artır, avtomobillərin çirklənməsinə səbəb olur. Sürücülər bildirirlər ki, problem mütəmadi olaraq təkrarlanır və aidiyyəti qurumlar tərəfindən arxların təmizlənməsi və suyun yola axmasının qarşısının alınması üçün tədbirlər görülməlidir.
